top of page
IMG_4521.jpg

A Christmas Carol

尚能飯聖誕日記事

冬眠過後
A Christmas Carol
Wicked

SNC10014.jpg

尚能飯聖誕日記事

冬眠過後A Christmas Carol

 

聖誕前世姪女來WhatsApp 問冬至有冇做節,回答開始冬眠,倫敦12月尾多雨,天常黑,日日昏昏沉沉,識得瞓,真係好好瞓,直到打拳日Boxing Day才蘇醒過來!

要知道耶穌名字就係蘇醒、復甦嘅意思,所以聖誕節用瞓覺嚟慶祝係啱嘅!

早幾個禮拜前去Waterloo嘅IMAX,本來想睇Gladiator II,但場數時間唔就,唔覺意睇咗Wicked,歌舞連場,都幾好睇!返嚟睇到舒琪話啲歌舞場面可以載入史冊…,咁又似乎誇張咗啲啲!

聖誕節前,跑到邊度,都會見到Wicked嘅廣告,簡直係形影不離。新舊大小媒介都將Wicked同埋綠野仙蹤 (The Wizard of Oz)拉埋嚟講,The Wizard of Oz 1939年上映,我都未出世,不過就久聞其名,聽過包括  Judy Garland嘅Somewhere Over The Rainbow,佢個女Liza Minnelli都係實力唱家班,不過對香港人就唔係真係咁Popular;另外就係Elton John 1973 年嘅致敬之作Goodbye Yellow Big Road,本來係想講告別繁華夢嘅,點知Elton John越玩越大,越大就越浮瓜,1998年接受埋伊利沙伯女王封爵,名利雙收,今年仲見佢出嚟攞The Gershwin Prize,其實就係心繫黃磚路,繁華夢不死。

至於綠野仙蹤我係後來補睇過嘅,不過又係好耐之前,真係唔係好記得㗎嘞!

講起 Wicked,其實膠膠地,入邊嘅女巫選角變咗黑色再加綠色,大概係講有色人種善良,但係受欺壓;然後就係啲動物,又係善良同埋受欺壓嘅,至於白種角色,不是欺壓人,就係偽善作狀。不過,華裔導演Jon M. Chu算係有節制,處理得不著痕跡,兼且流暢!

演女巫Elphaba嘅Cynthia Erivo算係中規中矩,不過執咗條好籌,主打歌曲Defying Gravity,我譯做「堅離地」唱到通街通巷,演羊咩教授嘅都幾傳神…,🤣🤣。真係有睇頭嘅係演Glinda嘅Ariana Grande,天生唱得音域寬闊,高音處隨時過C6 ,有機會爆玻璃,其實係大肺,遺憾就係生得矮細,5呎1吋高,着5吋高踭鞋都係啱啱到,非常petite,不自覺就走咗細粒鬼馬路線,演Glinda搔首弄姿Barbie feel,作作狀狀,其實非常入戲討好!

Wicked 嘅音樂劇2006年 9月15號開始喺維多利亞車站Victoria Station邊嘅Appollo劇院上演,已經18年不衰,我好奇訂咗飛睇閑日晏晝 2:30場,不過真係有啲「好奇害死貓」,睇完荷李活用銀両掟死你嘅電影版製作,再睇舞台劇就真係簡陋好多。

不過,劇院還是客似雲來,我睇嗰日有一大群着校服嘅學生嚟睇,老師帶隊,好似仲係講荷蘭話嘅,唔怪得倫敦又當選為世界第一城市, 12月天寒地凍黑鼆鼆,以為係旅遊淡季,卻依然係歌舞繽紛唔愁冇人嚟。

傻吓傻吓25號早晨扎醒,喜聞大鍾華膠博士獲頒終身成就獎,正當想道賀之時, WhatsApp已傳來鍾博士的《水調歌頭 · 2024聖誕祝願》宋詞一首,以宋詞入聖頌,膠味濃到化不開,便有如以長津湖之旅誌聖誕寒夜之異曲同工🤣🤣;遂問何以慶祝,博士唱議當食九大簋,與朋友及普天同慶!

順手掃描了諸朋久友WhatsApp聖誕賀詞,一律報以「祝大家聖誕勁 · 快樂,好人一世勁 · 平安!😄😄🍻」,最緊要長命百歲,身體健康!

此誌 2024年聖誕冬眠蘇醒後!

IMG_4504.jpg
bottom of page